Thinking Machines Lab, startup-i i Mira Muratit, paguan paga marramendëse përpara se të lansojë ndonjë produkt
Thinking Machines Lab (TML), startup-i më i ri dhe njëkohësisht më i përfolur në fushën e Inteligjencës Artificiale, i themeluar në fillim të këtij viti nga ish-drejtoresha teknologjike e OpenAI, Mira Murati, ka filluar të tërheqë vëmendje për një arsye tjetër përveç themelueses së saj: pagat jashtëzakonisht të larta për stafin teknik, edhe pse kompania ende nuk ka lansuar asnjë produkt.
Sipas dokumenteve federale amerikane të siguruara nga Business Insider, TML i ka ofruar disa prej punonjësve të saj teknikë paga bazë që shkojnë deri në 500,000 dollarë në vit. Konkretisht, dy punonjës teknikë paguhen me nga 450,000 dollarë, një tjetër merr 500,000 dollarë, ndërsa një bashkëthemelues me titullin “specialist i të mësuarit automatik” ka një pagë vjetore prej 450,000 dollarësh.
Të dhënat vijnë nga aplikimet për viza H-1B, që kompanitë duhet të paraqesin kur punësojnë punonjës të huaj të kualifikuar në SHBA. Këto shifra reflektojnë vetëm pagat bazë dhe nuk përfshijnë bonuset e hyrjes apo aksionet, të cilat në startup-et teknologjike shpesh përfaqësojnë përfitimet më të mëdha financiare.
Raporti vë në dukje se shifrat datojnë nga tremujori i parë i vitit 2025, përpara se Murati të mblidhte një financim fillestar prej 2 miliardë dollarësh dhe kompania të vlerësohej me 10 miliardë dollarë.
Ky agresivitet në pagesa ndodh në një kohë kur lufta për talentet në IA është bërë më e zjarrtë se kurrë. Vetë CEO i OpenAI, Sam Altman, deklaroi së fundmi se Meta po ofron bonuse nënshkrimi deri në 100 milionë dollarë për të përvetësuar talente nga konkurrentët.
Në krahasim me TML, konkurrentët e saj kryesorë ofrojnë paga dukshëm më të ulëta për pozitat teknike. OpenAI, për shembull, paguan mesatarisht 292,115 dollarë për 29 punonjës teknikë të përfshirë në aplikimet H-1B, me pagën më të lartë në 530,000 dollarë dhe më të ulëtën në 200,000 dollarë. Anthropic ofron mesatarisht 387,500 dollarë për 14 punonjës të tillë, me nivelin më të lartë të pagës në 690,000 dollarë dhe më të ulëtin në 300,000 dollarë.
Mira Murati, e cila kaloi më shumë se 6 vjet në OpenAI dhe luajti rol kyç në zhvillimin e ChatGPT, ishte për një periudhë të shkurtër edhe CEO e përkohshme e kompanisë në nëntor të vitit 2023, pas shkarkimit të përkohshëm të Sam Altman. Pas rikthimit të këtij të fundit, Murati u rikthye në rolin e saj si CTO, përpara se të largohej për të themeluar Thinking Machines Lab.
Me paga që sfidojnë gjigantët ekzistues të IA-së dhe me mbështetje të konsiderueshme financiare, Thinking Machines Lab duket e gatshme të bëjë zhurmë – edhe para se të prezantojë zyrtarisht ndonjë produkt në treg.
